Ĝi estas perlo de la regiono, historia urbo en la listo de UNESCO mondkulturheredaĵoj (kun la proksima minejo 'Rammelsberg'). La urbo apartenis al Hanso, la mezepoka germana komercligo, floris jam tiam kaj poste en la renesanco, akiris grandan politikan kaj religian gravecon, kaj danke al siaj minejoj ĝi fariĝis unu el la plej riĉaj urboj de tiama Germanio. Tio speguliĝas en la abundo da historiaj arkitekturaĵoj, plej unue en la centoj da tipaj faktrabdomoj.

Vizitindas la impona konstruaĵo „Kaiserpfalz”, la iama sidejo, palaco imperiestra. Allogas turistojn la belega urbodomo, la muzeoj, la ĉefplaco kun puto, sonorilludo, kafejoj, bierejoj. (Informoj en la germana ĉi tie.)

Ĝi estas la ĉefurbo de la federacia lando Niedersachsen (Malsupra Saksio).

La historia urbodomo kaj la operejo estas pompaj konstruaĵoj. En la urbocentro troviĝas multaj konataj magazenoj. La zoologia ĝardeno de Hannover estas unu el la plej belaj en Eŭropo.

La urborigardado enhavos vizitojn de la plej belaj konstruaĵoj, muzeoj kaj parkoj.

Herzberg am Harz: DT2 - 21.07.2016, ĵaŭdo

Urborigardado kun ĉiĉeronado en la Esperanto-urbo, vizito al la kastelo, muzeo

Rakontoj pri loka historio, legendoj; vizito al la Welf-kastelo kaj al la kastela muzeo, kie estas ankaŭ Esperanto-ekspozicia ĉambro.
Konatiĝo kun la Esperanto-vidindaĵoj (ZEOj) kaj aliaj allogaĵoj en la Esperanto-urbo. (Detaloj ankaŭ ĉi-tie.)


Welf-kastelo en Herzberg am Harz
La kastelon mencias la unuan fojon dokumento de Henriko la Leono el la jaro 1154. La nuna kastelo estis rekonstruita post detruiga fajro en 1510. La kastelo estas kvar-ala konstruaĵo ĉirkaŭ meza korto. En la korto speciale allogas la kastela turo pro artaj ornamaĵoj laŭ la stilo Weser-renesanco. Ĝi estas la plej granda faktrabstila kastelo de Malsupra Saksio kaj grava konstruad-monumento.

La kastela muzeo prezentas plurajn valoraĵojn, estas tie ekspozicio pri la posedintoj, la Welf-familio kaj pri loka historio. La vizitantojn informas Esperantlingva komputila gvidprogramo. En alia etaĝo de la muzeo estas prezentata arbarhistorio kaj forst-administrado en la Harz-regiono.

Esperanto-muzeo: Ekde decembro 2009 konstanta tereno estas je dispono por Esperanto-ekspozicioj kun informtabuloj en la germana, angla kaj en Esperanto. En la vitrinoj kaj informkestetoj 2-4 foje jare Interkultura Centro Herzberg prezentas ekspoziciojn el la riĉa kolektaĵo de sia biblioteko, arkivo.

Pliaj informoj: hejmpaĝo de Herzberg am Harz kun multaj ĉapitroj, informoj en Esperanto, laŭ aparta Esperanto-menuo.